مجھے دفتر خارجہ میں انسداد دہشت گردی امور کے رابطہ کار سفیر نیتھن اے سیلز کی داعش کے خلاف قائم عالمگیر اتحاد کے لیے امریکہ کے خصوصی نمائندے  کی اضافی ذمہ داری سنبھالنے کے لیے نامزدگی کا اعلان کرتے ہوئے خوشی ہے۔ ان کی تقرری امریکہ کے سبکدوش ہونے والے ایلچی جیمز جیفری کی جگہ عمل میں آئی ہے۔ سفیر سیلز اس اضافی ذمہ داری کے ساتھ امریکی دفتر خارجہ کے اس عالمگیر اتحاد کے ساتھ روابط اور داعش کی پائیدار شکست یقینی بنانے کی کوششوں کی قیادت کریں گے۔

سفیر سیلز اپنی حالیہ ذمہ داریوں میں انسداد دہشت گردی سے متعلق دفتر کی قیادت کے علاوہ انسداد دہشت گردی سے متعلق عالمگیر امور میں میرے مشیر اول کے طور پر خدمات انجام دے رہے ہیں۔ اس عہدے پر کام کرتے ہوئے انہوں نے عراق اور شام سے باہر داعش سے وابستہ تنظیموں اور اس کی شاخوں سے نمٹنے کے لیے امریکی حکومت کی کوششوں کی قیادت کی ہے۔

مجھے مکمل اعتماد ہے کہ سفیر سیلز تفوق اور عوامی خدمت کے لیے اسی لگن کے ساتھ اپنے فرائض کی تکمیل کریں گے جس کا مظاہرہ وہ روزِ اول سے کرتے چلے آئے ہیں۔